نیویارک:د امريکا ولسمشر بارک اوباما د راتلونکي مالي کال لپاره خپله بوديجه خپره کړې ده .په دې بوديجې کې حکومت ته د ٣ اعشاريه اتيا تريليون ډالرو د لګولو واک ورکړل شوی چې په دې کې د بوديجې خورا کسر هم راځي .
په نوې بوديجه کې پوهنې او علمي څېړنو ته پيسې ډېرې شوې خو ډېر نور کورني پروګرامونه پر خپل حال کنګل شوي يا لغوه شوي دي .
ولسمشر وویل هېواد يې د پخوا په څېر لګښتونه نه شي کولی او د بوديجې بې ساري کسر ته په پام سره بايد په خپلو امکاناتو سره ژوند کول زده کړي .
بارک اوباما د خپلې بوديجې په روښانوونکې وينا کې د امريکا د فضايي ادارې ناسا پلانونه لغوه کړل، چې غوښتل يې تر ٢٠٢٠ کال پورې بيا انسان پر سپوږمۍ پلی کړي .خو له بلې خوا افغانستان کې د پوځي لګښتونو بوديجه ډېره شوې ده .
ولسمشر د بوديجې د اعلان پرمهال له کانګرېسه وغوښتل چې افغانستان ته د نوو عسکرو د استولو د تمويل لپاره نورې پيسې هم منظورې کړي . د دغه کار لپاره په ٢٠١٠ مالي کال کې پر هغو ١٣٠ ميليارده ډالرو سربېره چې کانګرېس لا مخې د افغانستان او عراق د جګړې لپاره د جګړې لپاره منظرو کړي وو، نور ٣٣ ميليارده ډالره هم وغوښتل شول .
په دې سره د لومړي ځل لپاره د افغانستان لپاره د امريکا بېلې شوې پيسې د عراق په پرتله ډېرې شوې .
بوديجې دغه راز له پاکستان سره د اورپکۍ په ځپلو کې د ژمنه شوو پيسو اندازه هم ډېره کړې ده .
د اورپکۍ د ځانګړي صندوق له لارې د پاکستاني پوځ د تسليح ، تجهيز او روزنې لپاره پرووسږ کال ٧٠٠ ميليونه ډالره ورکړل شوي وو، خو دغه اندازه اوس ١٢ سوه ميليون ډالرو ته پورته شوې ده .
ټاکل شوې چې د ٢٠١١ کال په وروستيو کې له عراقه امريکايي ځواکونه ووځي او بارک اوباما هڅه کوي چې افغانستان کې د خپلو پوځيانو شمېر زيات کړي .
له ٢٠٠١ کال راپدېخوا د عراق او افغانستان پر جګړې کابو يو تريليون ډالره لګول شوي دي .