ميدان ښار – په ميدان وردګو کې پرون  د مڼې ګل دوديزه مشاعره د هېواد د بېلابېلو ولايتونو څڅه د سلګونو شاعرانو په ګډون جوړه شوه .

په دغې مشاعر کې د کابل، ننګرهار، لغمان، کونړ، خوست، پکتيا، پکتيکا، غزني، کندهار، کندوز او يو شمېر نورو ولايتونو په سلګونو شاعرانو، ليکوالانو، د ولسي جرګې غړيو، چارواکيو او د ياد ولايت اوسېدونکيو ګډون کړى وو.

د ميدان وردګو والي محمد حليم فدايي د شاعر او شعر په اړه اوږدې خبرې وکړې .

هغه زياته کړه، چې د شاعر ښه حرکت، فکري يون په ټولنه کې رامنځته کوي او شاعر، ليکوال او ژورناليست بايد ولس عقلاني لارې ته وهڅوي . فدايي، شاعران او ليکوالان د فکر، ذهن او ولس جوړونې معماران وبلل .

په مشاعره کې يوه جرمني، چې افغانانو پرې زمرى نوم اېښى او د پښتو په ګډون په۴۰ژبو روانې خبرې کولى شي، هم برخه لرله .زمري په دې مشاعرې کې وويل، چې له پښتو ژبې سره د زياتې مينې له امله يې په دې مشاعره کې برخه واخيسته .

د هېواد وتلي ليکوال، څېړونکي او شاعر حبيب الله رفيع په دې خوښي وښوده، چې ددغې مشاعرې عمر لسو کلونو ته اوږد شو.

په ياد شوې مشاعره كې د بيان له ازادۍ څخه په ګټه د ماندگار دورځپاڼې د مطالبو په څېر شعرونه ، چې مستقيم شخصي سپكاوى بلل كيده ،هم وويل شول . په پاى کې يې د لسو رسنيو ادارو ته ستاينليکونه هم وويشل شول .